ኢትዮጵያ በብዝሀ ሕይወት እና በተፈጥሮ ሀብቷ ትታወቃለች። ከእነዚህ የተፈጥሮ ሀብቶች መካከል አምስቱ የባዮስፌር ሀብቶች - የማጃንግ ደን ፣ ያዩ ቡና ደን ፣ ከፋ ጫካ ፣ ጣና ሐይቅ እና የሸካ ደን ሲሆኑ በተለያዩ ጊዜያት በዩኔስኮ የዓለም ቅርስ ዝርዝር ውስጥ ተመዝግቧል።

የስብሰባው ዓላማ ስለ ባዮስፌር ክምችት ወቅታዊ ሁኔታ ፣ ተግዳሮቶች ፣ ዕድሎች እና አስተዳደራዊ ልምዶች እንዲሁም የሰው እና የባዮስፌር ሪዘርቭ ብሔራዊ ኮሚቴ ሥራን ለማጠናከር መሆኑ ተጠቅሷል፡፡

በእነዚህ የባዮስፌር ክምችቶች ላይ ሥራውን የማስተባበር ኃላፊነት ያለው የኢትዮጵያ ብዝሀ ሕይወት ኢንስቲትዩት ሲሆን ከአካባቢ ፣ ደንና የአየር ንብረት ለውጥ ኮሚሽን ጋር በመተባበር የግንዛቤ መፍጠርና የምርምር ሥራዎችን እያከናወነ መሆኑ ቀርቧል፡፡

የኢንስቲትዩቱ ዋና ዳይሬክተር መለሰ ማሪዮ(ዶ/ር) በስብሰባው ላይ የባዮስፌር ሪዘርቭ በዘቦታ ጥበቃ ላይ ትልቅ ሚና ይጫወታል ብለዋል።

የአከባቢ፣ የደን እና የአየር ንብረት ለውጥ ኮሚሽን ኮሚሽነር ፕሮፌሰር ፍቃዱ በየነ በበኩላቸው የአገሪቱ ባዮስፌር ጥበቃ ዋና ዓላማዎች የጄኔቲክ ሀብቶችን እና ሥነ ምህዳሮችን መጠበቅ ፣ ሳይንሳዊ ምርምር ማካሄድ እና ለአከባቢው ማህበረሰብ ዘላቂ ልማት ማረጋገጥ ናቸው ብለዋል።

ኢትዮጵያ የሰው እና የባዮስፌር መርሃ ግብርን ተግባራዊ ለማድረግ የፌዴራል መንግሥት መሥሪያ ቤቶችን ፣ የምርምር ተቋማትንና ዩኒቨርሲቲዎችን እንዲሁም የሙያ ማኅበራትን ያካተተ ብሔራዊ ኮሚቴ ለማቋቋም እየሠራች ነው። ከዚሁ ጋር ተያይዞ ኮሚቴው የሚሰራበት ባዮስፌር ክምችት ላይ ረቂቅ መመሪያና የድርጊት መርሃ ግብር ተዘጋጅቶ ውይይት ተደርጎበታል።

በተጨማሪም በአምስቱ የባዮስፌር ክምችት ሁኔታዎች ፣ ስኬቶች እና ተግዳሮቶች ዙሪያ ውይይት የተደረገባቸው ሲሆን የወደፊት አቅጣጫዎችን በማስቀመጥና ረቂቅ መመሪያውን በማጽደቅ ተጠናቋል።